Hasi da Emakumeon Mundu Martxaren XI. Nazioarteko Topaketa. Euskal Herrian dira 42 lurraldetatik etorritako 110 emakumeak, bi urtean behin egiten duten Topaketari ekiteko prest. Eta nola ez, merezi duten harrera egin diegu guk!
Atzo arratsaldeko 17:00etan Areatzan elkartu eta kalejiran etorri ginen Bizkaia Aretoraino. Bertan, albokari gazte bat genuen zain, barruan zeudenei iristen ari ginela ohartarazi ziena, dena presta zezaten. Behin barruan, txalapartaren laguntzaz Boutou dantza afrikarra eskaini zigun Euskal Herriko Mundu Martxako kide batek, eta ikuskizun hunkigarri horren ostean aretora sartu ginen.
Nazioarteko delegatuak, ikuskatzaile moduan parte hartzera etorri diren aliatuak eta Euskal Herriko mugimendu feministako kideok bete genuen Bizkaia Aretoko Koldo Mitxelena sala. Gogotsu geunden denok, eta ez genuen ezer behar batek “gora borroka feminista” oihu egin eta beste denok erantzuteko. Giro horretan atera ziren bederatzi emakume Kaxarranka, Lekeitioko dantza tradizionala dantzatzera, tradizioak gizonena dela esan arren, emakumeok geureganatu duguna. Dantza honi bertsoek eta Fekooreko berdintasun komiteko kide baten irakurketak eman zioten jarraipena: “iraultza feminista izango da, edo ez da izango”, hala amaitu zuen bere testua.
Baina kultura eta sorkuntzaz gain, Euskal Herriko mugimendu feministaren historiari begirada bat bota nahi izan genion, Gure genealogia feministak liburuan oinarritutako bideo baten bidez. Eta ibilbide historiko horren errepasoan, nola ez egin geldialdi bat Mundu Martxaren sorreran; bi kidek euren bizipenak elkarbanatu zituzten gu guztiokin.
Nazioarteko delegatuei ongi etorria ofizialki eman genien unean gora etorri zen aretoa. Graça Samo, Emakumeon Mundu Martxako idazkari nagusiak eskerrak eman zizkigun denen izenean. Ekitaldia borobiltzeko abesten jarraitu genuen, La Cora Bilboko abesbatza lehenik, MICE taldeak Feministon Herriako egin digun abestia ondoren, eta nola ez, Zutik Emakumeak abestu eta eskual altxaz itxi genuen eguna. Ofizialki, behintzat; izan baitzen gero festan jarraitu zuenik!
Argazkiak: @EcuadorEtxea